Haki Demolli: zhvillimet e fundit ne Kosove ndikojne ne ngecjen e transformimit te FSK-së

156

Ministri për Forcën dhe Sigurinë e Kosovës, Haki Demolli kërkoi nga të gjitha partitë politike në vend, të angazhohen për të gjetur zgjidhje të krizës. Sipas tij, zhvillimet e fundit në Kosovë kanë ndikuar drejtpërdrejtë në ngecjen e proceseve të rëndësishme për Kosovën, përfshirë këtu edhe atë për transformimin e Forcës së Sigurisë së Kosovës në Forcë të Armatosur.

“FSK paraqet garancën se në të ardhmen do të shndërrohet në Forcë të Armatosur. Përvjetori i 18-të i Epopesë e ka gjet vendin me mospajtime e kundërshtime të theksuara mes partive. Andaj në këtë përvjetor, kërkoj nga të gjithë akterët politik që të lënë anash interesat e grupeve apo partive vetanake dhe të kenë parasysh vetëm interesin e popullit, ashtu siç e kishte komandanti Adem Jashari dhe shokët e tij. Dhe, të angazhohen për të gjetë zgjidhje për këtë situatë. Sepse zhvillimet në Kosovë, me pamje të dhunshme, drejtpërdrejtë kanë ndikuar në ngecjen e proceseve të rëndësishme. Kur them këtë, kam parasysh faktin që edhe pse Qeveria e ka prioritet shndërrimin e FSK-së, ajo nuk ka ndodh gjatë vitit të kaluar, pikërisht për shkak të zhvillimeve jo normale. Andaj duhet shpresuar që gjatë këtij viti do të dominoj interesi i shtetit. Të arrihet një zgjidhje dhe të krijohen rrethanat që qeveria dh kuvendit të marrin veprimet ligjore për transformim”, ka thënë Demolli.

Ai tha se përmes krijimit forcës së Armatosur të Kosovës, Qeveria do të ngris shkallën e sigurisë së vendit, për të gjithë qytetarët pa dallim, të cilët pastaj do të jenë më të sigurt.

Këto deklarata, Demolli i tha në akademinë përkujtimore që po mbahet në Prishtinë, me rastin 18 vjetorit të rënies heroike të familjes Jashari./KosovaPress/.