Simpatizantët e LDK-së, me flamurin dardan në dorë, kundër Thaçit president

89

Një grup simpatizantësh të Lidhjes Demokratike të Kosovës, që bartnin flamurin dardan dhe amerikan në dorë, kanë qëndruar sot pranë përmendores së ish-presidentit të Kosovës, Ibrahim Rugova, në kundërshtim të zgjedhjes së Hashim Thaçit president i Kosovës.

Ndonëse LDK, që është në koalicion me PDK-në, do ta mbështesë zgjedhjen e Thaçit president, brenda strukturave të ndryshme të kësaj partie ka pasur zëra kundërshtues, veçanërisht mes mbështetësve dhe votuesve tradicionalë të partisë.

Në ndërkohë, Kryesia e Kuvendit të Kosovës sot vendosi që seanca për zgjedhjen e presidentit të Kosovës të mbahet të premten në ora 11:00.

Seanca u thirr nga deputetët e koalicionit me iniciativë të shefit të GP të PDK-së, Adem Grabovci. Iniciativës i dhanë mbështetje edhe deputetët e LDK-së, ndonëse disa prej tyre kanë deklaruar hapur se do ta kundërshtojnë Thaçin në këtë seancë./Kosova Press