Petkoviq “shantazhon” kosovarët e Zvicrës

246

Të gjithë tifozët e kombëtares të mbeten të qetë… Valon Behrami vazhdon!

Ky ishte titulli i mbrëmjes nga Blick Sport, gazetës zvicerane.

Në fakt, e vërteta e gjithë kësaj është se Behrami mbetet në listën e futbollistëve të kombëtares, që do të luajnë për kualifikimet e botërorit të vitit 2018 që luhet në Rusi.

Por tutje, në këtë intervistë, Behrami shpalos se rreth të ardhmes do të diskutojë me familjen, ndërsa kuptohet se ai natyrisht vazhdon të jetë i Zvicrës.

E, për këtë burime të afërta të Sportit në KTV, me futbollistët kosovarë të kombëtares së Zvicrës, bëjnë të ditur se në fakt, asnjëri nga yjet kosovarë të Zvicrës, ende nuk ka vendosur se a do të vazhdojnë me Helvetikët, apo do t’i bashkohen Kosovës.

Pra, Granit Xhaka, Xherdan Shaqiri, Valon Behrami e Shani Tarashaj janë ende në dilemë.

Sporti në KTV mëson se ata janë në pritje të ftesës zyrtare nga Federata e Futbollit të Kosovës, ndërsa lidhur me këtë ka gjasa të organizohet një takim në Angli, mes futbollistëve Kosovarë të Zvicrës, Behramit, Xhakës, Shaqirit e Tarashajt, dhe selektorit e zyrtarëve të FFK-së, ku do të diskutohet rreth mundësisë së aktivizimit të tyre me Kosovën, dhe po ashtu do t’u bëhet edhe ftesa zyrtare, pasi deri më tani veç bisedave jo formale kryesisht nëpër telefona, nuk ka pasur asgjë konkrete në këtë drejtim. Sporti në KTV, po ashtu mëson se në radhët e futbollistëve kosovarë të Zvicrës ekziston skepticizmi lidhur me organizimin dhe kushtet që do t’i gjejnë nëse i bashkohen kombëtares së Kosovës.

Ata janë të bindur se 90 për qind e asaj që kanë me Zvicrën nuk do ta gjejnë nëse i bashkohen Kosovës, dhe bashkimi me Kosovën, është njëfarë mënyre sakrificë dhe rrezikim, për shkak të mosekzistimit të një organizmi të mirëfilltë që duhet ta ketë një kombëtare dhe futbolli i një shteti.

Ndërkohë, veç kësaj, Sporti në KTV mëson edhe një arsye tjetër që shihet më shumë si shantazh ndaj të gjithë futbollistëve kosovarë që janë në ekipin senior të Zvicrës dhe ata të grupmoshave të reja.

Selektori aktual i Zvicrës, VladimirPetkovic, u ka sugjeruar familjarëve të futbollistëve Kosovarë të Zvicrës, që të mos i bashkohen Kosovës, pasi sipas tij, një hap i tillë, do të mbyllte dyert për të gjithë kosovarët e tjerë që janë te grupmoshat e reja të Zvicrës, e të cilët janë me dhjetëra e dhjetëra nga grupmoshat nën 16 vjeç e tutje, e të cilët shpejt do të jenë të gatshëm edhe për ekipin e parë.

Ndërsa kujtojmë, se një ditë më parë, u mësua edhe publikisht modalitetet e rrugës që duhet ndjekur futbollistët që dëshirojnë t’i bashkohen Kosovës.

Nga ajo që shkruan “Kosovan Football”, në Twitter, një lojtar që dëshiron të luajë për Kosovën duhet të paraqesë një letër-kërkesë në bashkëpunim me FFK-në, duke shprehur në të dëshirën për të luajtur me përfaqësuesen kosovare.

FIFA më pas do të shqyrtojë çdo kërkesë individualisht e do japë përgjigjen përfundimtare.

Kështu futbollistët me prejardhje nga Kosova, por që luajnë me kombëtare të huaja, megjithatë mund të luajnë për Kosovën, por për këtë do të vendosë më pas edhe FIFA.

Njohja zyrtare dhe pranimi i Kosovës në FIFA e UEFA, ka krijuar një situatë juridikisht të paqartë, pasi ka shumë lojtarë që aktivizohen në Kombëtare të tjera.